Author: Urdu Contributor

ذ ہنی دباوٗ (ڈپریشن)سے رہائی

دُعا
اَےخُداوند یسوع،میں اپنا سب کچھ تیرے حوالے کرتا/کرتی ہوں۔ میرے خیالات،میرا دل اور میری جان سب تیرے ہیں۔ اَے یسوع مجھے اپنی پاک حضوری سے معمورکردے۔
اَ ے خُداوند میرے اندر سے تاریکی کے ان تمام کاموں کو مٹا دے جو تیری طرف سے نہیں ہیں۔میں اپنے بدی کے سب خیالات(جذبات) کو تیری صلیب کے نیچے ڈال دیتا /دیتی ہوں۔مجھے رہا کر(یہاں ان تمام تاریکی کے کاموں کو تحریر کریں جو آپ اپنے اندر محسو س کرتے ہیں)۔
میں اعلان کرتا/کرتی ہوں کہ میری مافوق الفطرت خوشی کا منبع تو ہے۔اَے یسوع، صرف تو ہی میری زندگی کے ہر تاریک حصہ کو روشن کر سکتاہے۔تو ماضی کے تمام زخموں کو مٹا سکتا ہے اور مجھے خوشی بخش سکتاہے۔ اَے یسوع میں تیری حضوری میں شادمان ہوں!
اَے خداوند ہر رو ز مجھے شادمانی عنایت کر۔تیرا نور مجھ پر چمکے اور میرے وسیلہ سے اِرد گرد لوگوں تک بھی پہنچے۔میں یسوع کے لہو کو اپنے دل، دماغ اور جان میں مانگ لیتا /لیتی ہوں تاکہ پھر کبھی مایوسی کا شکار نہ ہوں۔یسوع کے نام میں آمین۔
اِقرار واَعلان
خداوند میری قوّت اور میری سِپر ہے۔ میرے دل نے اُس پر توّکل کیا ہےا ور مجھے مدد ملی ہے ۔اِسی لئے میرا دل نہایت شادمان ہے اور میں گیت گاکر اس کی ستائش کروں گا۔ زبور ۲۸: ۷

تومجھے زندگی کی راہ دکھا ئے گا۔
    تیرے حضور میں کامِل شادمانی ہے۔
  تیرے داہنے ہاتھ میں دائمی خوشی ہے۔ زبور ۱۶ : ۱۱

تو بھی میں خداوند سے خوش رہوں گا
اور اپنے نجات بخش خدا سے خوش وقت ہوں گا۔ حبقوق ۳ : ۱۸
کیونکہ اے خدا وند !تو نے مجھے اپنے کام سے خوش کیا۔
میں تیری صنعت کاری سے سبب سے شادیانہ بجاوٗں گا۔ زبور ۹۲ : ۴

اس لئے کہ خداوند تیرا خداتیرے سارے مال میں او رسب کاموں میں جن کو ہاتھ لگائے تجھ کو برکت بخشے گا۔سو تو پوری پوری خوشی کرنا۔ استثنا ۱۶ : ۱۵

حوالہ جات
صبح کو اپنی شفقت سے ہم کو آسودہ کر ۔تاکہ ہم عمر بھر خوش و خرم رہیں۔ زبور ۹۰ : ۱۴

اے میرے بھائیوں جب تم طرح طرح کی آزمائشیوں میں پڑو ۔ تو اس کو یہ جان کر کمال خوشی کی بات سمجھنا کہ تمہارے ایمان کی آزمائش صبر پیدا کرتی ہے۔ یعقوب ۱ : ۲۔۳

اور جن کو خداوند نے مخلصی بخشی لوٹیں گے اور صیون میں گاتے ہوئے آئیں گے اور ابدی سرور ان کے سروں پر ہوگا وہ خوشی اور شادمانی حاصل کریں گے اور غم و اندو کافور ہو جائیں گے۔ یسعیاہ ۳۵ : ۱۰

کیونکہ اس کا قہر دم بھر کا ہے اور اس کا کرم عمربھر کا۔رات کو شاید رونا پڑے پر صبح کو خوشی کو نوبت آئے گی۔ زبور ۳۰ : ۵

اَے سب اُمتو ! تالیا ں بجاوٗ۔خدا کے لئے خوشی کی آواز سے للکارو۔ زبور ۴۷ : ۱

پس خدا جو امید کاچشمہ ہے تمہیں ایمان رکھنے کے باعث ساری خوشی اور اطمینان سے معمور کرے تاکہ روح القدس کی قدرت سے تمہاری امید زیادہ ہوتی جائے۔
رومیوں ۱۵: ۱۳

خداوند میں ہر وقت خوش رہو، پھر کہتا ہوں کہ خوش رہو۔ فلپیوں ۴ : ۴

خداوند کی حمد کرو۔ مبارک ہے وہ آدمی جو خداوند سے ڈرتا ہے اور اس کے حکموں میں خوب مسرور رہتا ہے۔ زبور ۱۱۲: ۱

اس سے تم بے دیکھے محبت رکھتے ہواور اگرچہ اس وقت اس کو نہیں دیکھتے تو بھی اس پر ایمان لا کر ایسی خوشی مناتے ہو جو بیان سے باہر اور جلا ل سےبھری ہے اور اپنے ایمان کا مقصد یعنی روحو ں کی نجات حاصل کرتے ہو۔ ۱ پطرس ۱ : ۸۔۹

اور اِیمان کے بانی اور کامل کرنے والے یسوع کو تکتے رہیں جس نے اُس خوشی کے لئے جو ا ُس کے سامنے تھی شرمندگی کی پرواہ نہ کر کے صلیب کا دُکھ سہا او رخدا کے تخت کی دہنی طرف جا بیٹھا۔ عبرانیوں ۱۲ : ۲

روح کا پھل

روح کے ۹ پھل ہیں۔ یہ ہمارے اندرسے نہیں بلکہ براہٗ راست خدا کے پاک روح سے جاری ہوتے ہیں  ۔ یہ وہ نعمتیں ہیں  جو ہمیں آسمانی باپ سے ملتی ہیں۔وہ  ہمیں توفیق عنایت کرتا ہے کہ ا س کی خوبیوں  کو اپنےا ندر رکھیں اورآسمانی مقاموں میں رسائی حاصل کریں۔ہمارے باپ کی نعمتیں نہ صرف ہمیں اندر باہر سے تبدیل کرتی ہیں بلکہ ہمارے اِرد گرد رہنےوالے لوگوں کی زندگیوں کو بھی بدل دیتی ہیں۔ ان پھلوں کے وسیلہ سے ہم خدا کا نور دوسروں پر چمکاتے ہیں تاکہ وہ ہمارے وسیلہ سےاُس کو جا ن سکیں۔

ہم اِن خوبیوں کو خود سے پیدا نہیں کر سکتے۔یہ روح القدس سے جنم لیتی ہیں جو ہمارے اندر رہتاہے۔ جس قسم کا بیج بویا جاتا ہے اُسی قسم کا پھل پیدا ہوتا ہے۔خدا کا روح اس وقت ہم میں بستا ہے جب ہم یسوع کو اپنے دلوں اور زندگیوں میں دعوت دیتے ہیں۔اور پھر خدا کی خوبیاں ہم میں سے ظاہر ہوتی ہیں۔اوربعض اوقات ہمیں کچھ بھی نہیں کرنا پڑتا۔ جتنا زیادہ ہم اس کے ساتھ وقت گزاریں گے اور اس کے کلام کو پڑھیں گے اتنا ہی ہم تبدیل ہوتے جائیں گے۔

اگر ہمیں محسوس ہو کہ خدا کی   ان خوبیوں میں سے ایک   بھی خوبی  ہم میں موجود نہیں ہے تو ہم ہمیشہ خدا سے مدد کی درخواست کر سکتے ہیں۔وہ خوش ہوتا ہے جب ُاس کے فرزند اُس کی خوبیوں کو اپنے اندر رکھنا چاہتے ہیں۔ آج ہی خدا سے مانگیں اور وہ آپ کو دے گا!

کلام کے حوالہ جات

گلتیوں ۵: ۲۲۔۲۳

کیونکہ روح کا پھل محبت، خوشی، اطمینان، تحمل، مہربانی، نیکی،اِیمانداری(وفاداری)،حلم ،پرہیز گاری ہے۔ ایسے کاموں کی کوئی شریعت مخالف نہیں۔

خدا کے پھلوں کی بڑھوتی کے لئے دُعا

پیارے خداوند،

تیرے قیمتی روح کے پھل کے لئے تیرا شکر ہو۔ہر روز میری مدد کر تاکہ میں تیری خوبیوں کو ظاہر کروں۔میں تیری مانند بننا  اور کام کرناچاہتا/چاہتی ہوں ۔اَے باپ مجھے اپنی محبت سے لبریز کردے۔میرے اندر بیان سے باہر خوشی ڈال دے۔میری مدد کر تاکہ میں لوگوں پر تیری مہربانی اور نیکی کو ظاہر کروں۔اے یسوع جیسا تو وفادار ہے میری بھی مدد فرما کہ میں بھی الہی ٰ وفا میں چل سکوں۔ اَے خداوند مجھے  حلیمی اور پرہیز گاری سے بھر دے۔یسوع کے قادر نام میں آمین۔

خدا آپ کا اطمینان ہے

’’کسی بات کی فکر نہ کروبلکہ ہرایک بات میں تمہاری درخواستیں دُعا اورمنت کے وسیلہ سے شُکرگزاری کے ساتھ خُدا کے سامنے پیش کی جائیں۔ تو خُدا کا اطمینان جو سمجھ سے بالکل باہر ہے تمہارے دِلوں اور خیالوں کو مسیح یسوع میں محفوظ رکھے گا۔‘‘ (فلپیوں ۴ : ۶۔ ۷)

اگرآپ کسی فیصلہ کے تعلق سے شدید پریشانی یا الجھاوٗ  کا شکار ہیں تو عین ممکن ہے کہ آپ خدا کی آواز سننے کے بجائے اپنے  خیالات میں پھنسے ہوئے ہیں۔بائبل فرماتی ہے کہ ’’خدا ابتری کا خدا نہیں ہے۔‘‘( ۱ کرنتھیوں ۱۴ : ۳۳)۔ وہ ابتری کا بانی نہیں ہے۔پس اگرآپ اپنی زندگی میں الجھاوٗ کا شکار ہیں تو آپ  کو جاننا چاہیے کہ یہ خدا کی آواز نہیں ہے۔

پچھلے ہفتے میں نے فیصلہ جات  اور اُن انتخابات کے تعلق سے کچھ تحریر کیا جو مسیحی کی حیثیت سے ہمیں کرنے پڑتے ہیں ۔ اور شاید سب سے اہم فیصلہ جو ہمیں کرنا پڑتا ہے  وہ خدا کی فرمانبرداری کا ہے۔جب  بھی آپ  خدا کی فرمانبرداری کے لئے تیار ہوتے ہیں تو اطمینان محسوس کرتے ہیں۔ اوراگرآپ خدا کی فرمانبرداری سے انکار کرتے ہیں تو  ذرا ٹھہریں اور سوچیں کہ کیا  اس وقت بھی آپ کے دل میں حقیقی اطمینان  موجود رہتا ہے۔

ابلیس  چاہتا ہے کہ آپ  لاچاری اور مجبوری  کے تحت فیصلے کریں، لیکن خدا آپ  کو مہربانی (محبت)سے اپنی طرف مائل کرناچاہتا ہے۔ابلیس آپ  کی مجبوری  کا فائدہ اُٹھا کر  آپ کو گناہ میں دھکیلنا چاہتاہے۔ لیکن خدا آپ کا اچھا چرواہا ہےاس لئے وہ آپ کو اپنی نزدیکی اور  حقیقی اطمینان دینا چاہتا ہے۔

جس طرح ٹیلی وژن  نیٹ ورک  چلانے کے لئے  ٹی .وی .سگنل  کی ضرورت ہوتی ہے، اُسی طرح ہمیں روحانی  سگنل موصول ہوتے ہیں۔اور  جس طرح ہم مخصوص چینل دیکھنے کے لئے ٹیلی وژن سگنل کاچناوٗکرتے ہیں اسی طرح ہمارے پاس روحانی سگنل کا چناوٗ بھی موجود ہے۔ سوال یہ ہے کہ ’’آپ کون سا چینل دیکھ رہے ہیں؟‘‘’’آپ کس کی آواز سن رہے ہیں؟‘‘اگر آپ کو خدا کی طرف سے ہمیشہ منفی پیغامات موصول ہوتے ہیں  تو کچھ گڑ بڑ ہے۔سگنل ادَل بدل ہو چکے ہیں۔

ایک ہی ٹیلی وژن پر آپ دو  پروگرام ایک ساتھ نہیں دیکھ سکتے اور اِسی طرح آپ خدا اور دشمن کی آواز ایک ساتھ نہیں سن سکتے۔آپ کو کسی ایک کی آواز سننے کافیصلہ کرنا ہے۔ اگر آپ کو محسوس ہوتا ہے کہ خدا آپ سے کچھ کہہ رہا ہے لیکن  اس کی وجہ سے آپ کی پریشانی میں اضافہ ہو گیا ہے تو کہیں گڑبڑ ہے۔میں آپ کی حوصلہ افزائی کرتا ہوں کہ دعا کریں کہ خدا ا ن مخصوص حالات میں آ پ سے کلام کرے۔

اگر آج آپ پریشان ہیں اور شدید تناوٗ کا شکار ہیں اور حالات آپ کی توقع کے مطابق نہیں ہیں تو آپ کو ایک فیصلہ کرنا ہے،یا تو آپ حیرانی  سے سب کچھ بکھرنے کا انتظار کریں یا خدا پر ایمان اور بھروسہ کرنے کا فیصلہ کریں۔

ہم سب کو کسی نہ کسی  پریشانی اور تناوٗ کا سامنا کرنا پڑتا ہے۔ اس وقت کچھ لوگوں کو پسینہ آتاہے کچھ لوگ چِلاتے ہیں اور کچھ بالکل خاموش ہوجاتے ہیں۔ کیا آپ بھی مصائب  کے بارے میں سوچتے رہتے ہیں؟کیا آپ مستقبل کے تعلق سے نااُمیدی کا شکار ہیں؟کیا آپ کو لگتا ہے کہ خدا بہت دُور ہے؟کیا آپ کو جسمانی علامات جیسے  سَر درد، ناخن چبانایا پیٹ میں گڑ بڑ محسوس ہوتی ہے؟کیا ناکامی اور شکستگی کو قبول کرنا آپ کے لئے مشکل ہے؟کیا آپ تھک چکے ہیں؟ کیا آپ کو فیصلہ کرنا مشکل لگتا ہے؟کیا مختلف واقعات آپ کے دماغ میں گھوم پھر  کرباربار واپس آتے ہیں؟یہ سب پریشانی اور تناوٗ کی نشانیاں ہیں۔

ہم سوچتے ہیں کہ  فکر  کرنا ہمارے لئے اچھّا ہے۔ کیونکہ اِس طرح کرنے سے ہمیں یاد رہتا ہے کہ کیا کرنا چاہیے اور ہم اپنے اگلے اقدام کا تعین کر سکتے ہیں ۔ لیکن سچائی یہ ہے کہ یہ ہمارے فائدے کی چیز نہیں ہے بلکہ اس کے برعکس پریشانی ہم پر حاوی ہو جاتی ہے ۔یہ ہماری خوشی کو چھین کر ہمارے تعلقات میں بگاڑ پیدا کرتی ہے۔جب تک ہمیں فکر کرنے کے علاوہ کوئی اچھا کام نہیں مل جاتا ہم فکرکرتے رہیں گے۔

آپ کس طرح پریشانی سے چھٹکارا پا سکتے ہیں؟ میں چاہتا ہوں کہ اس ہفتے آپ متی ۸ باب میں موجود کہانی پر غور کریں جہاں یسوع نے پریشانی کے تعلق سے کلام کیا ہے۔آپ ایمان سے حقیقت کا سامنا کرنا سیکھ لیں گے۔

خدا آپ کے توڑوں اور نعمتوں کو استعمال کرتا ہے!

پچھلے دو ہفتوں سے اسکول میں مطالعہ کے دوران میں نے محسوس کیا ہے کہ خدا مجھے  میری زندگی کےمقصد سے آگاہ کرنے کے ساتھ ساتھ  مجھے بتا رہا ہے کہ  اس کی بادشاہی اورجلال کے لئے نعمتوں کےاستعمال کی اہمیت اور ضرورت کیا ہے۔

میرا ایمان ہے کہ خدا نے جس لمحہ ہمیں چنا تھا اُسی لمحہ ہم میں سے ہر ایک کو نعمتیں اور توڑے بخش دیئے تھے (یرمیاہ ۱ : ۵ اور زبور ۱۳۹: ۱۶)۔خدا غلطیاں نہیں کرتا اور جو کچھ وہ تخلیق کرتااور کام کرتا ہے وہ اچھّا ہے۔آج میں آپ کو ابھارنا  چاہتا ہوں کہ اس مطالعہ کے دوران جو سوال میں آپ سے کروں آپ  دیانتداری سے غوروفکر کے بعد ان کاجواب دیں ۔

یہاں ٹھہریں اور پڑھیں متی ۲۵ : ۱۴۔۳۰

پہلا سوال:کیا آپ وقت  کو غنیمت جان کر اپنے توڑوں کو استعمال کرتے ہیں؟اس تمثیل میں مالک نے اپنے نوکروں کو ایک لمبے عرصہ کے لئے اپنی میراث سونپ دی۔ اس لمبے عرصہ کے دوران جو بھی انہوں نے کیا وہ اپنے مالک کو خوش کرنے اور عزت دینے کے لئے بہت لازمی تھا۔

خدا نے آپ کو بھی کوئی نہ کوئی توڑا  یا  نعمت عطا کی  ہوئی ہے۔وہ موسیقی، شفاعت کرنا، آرٹ،مضمون نگاری،کھیل،درس وتدریس وغیرہ ہوسکتا ہے۔ابھی آپ کے پاس وقت ہے کہ آپ فیصلہ کریں کہ آپ اپنے توڑوں اور نعمتوں کو کس طرح استعمال کریں  گے ۔جب خدا آپ کو کوئی توڑا دیتا ہے تووہ توقع کرتا ہے کہ آپ اس کو استعمال  بھی کریں۔یہ ہمارے جسم میں موجود پٹھوں اور عضلات کی مانند ہیں اگر آپ ان کو استعمال کریں گے تو یہ مضبوط ہوں گے اور  اگر آپ انہیں استعمال نہیں کریں گے تو یہ بے کار ہو جائیں گے۔اگر آپ کے پاس کوئی توڑا ہےاور آپ اس کواستعمال کرنے سے خوف زدہ ہیں یا اس کو استعمال کرنے میں سستی کا مظاہرہ کرتے ہیں  توآپ اُسے کھو دیں گے۔ لیکن اگرآپ اپنے توڑوں کو سمجھداری کے ساتھ استعمال کریں گے تو خدا آپ کو اور دے گا۔

دوسرا سوال:کیا آپ اپنے توڑوں کو اچھے طریقہ سے استعمال کر رہے ہیں؟اس تمثیل میں پہلے دو نوکروں نے اپنے توڑوں کو اس توقع کے ساتھ استعمال کیا کہ ان سے اور کمائیں ۔تیسرے نوکر نے خوف کی وجہ سے اپنے توڑے کو چھپا دیا۔

میں بہت سے ایسے لوگوں  کو جانتا ہوں اور  ان سے ملا بھی ہوں جن میں  بزرگ اور جوان   دونوں شامل ہیں جنھوں نے اپنے توڑوں کو استعمال نہیں کیا؛اور میں اقرار کرتا ہوں کہ میں نے بھی ایسا کیا ہے۔ میں اس تمثیل میں موجود تیسرے نوکر کی مانند خوف زدہ تھا۔ مجھے یہ  معلوم نہیں تھا کہ میں ان توڑوں کو اچھے طریقہ سے استعمال کر کے ان کو بڑھا سکتا ہوں۔لیکن جب میں نے یہ جان لیا کہ مجھے یہ توڑے خدا نے  اپنی مرضی سے عنایت کئے  ہیں  اور مجھے ان کو اس کے معیار کے مطابق استعمال کرنا ہے۔ تو میں نے سوچا کہ میں نے کیوں ان نعمتوں اور توڑوں کو اب تک  اس کی بادشاہی اور جلا ل کے لئے استعمال نہیں کیا؟

خوف زدہ ہونا چھوڑ دیں!آج ہی فیصلہ کریں اور خدا کے معیار کے مطابق ان کو استعمال کرنے کے لئے تیار ہو جائیں۔ہو سکتا ہے کہ شروع میں آپ کو ناکامی کا سامنا کرنا پڑے لیکن ہم سب کبھی نہ کبھی ناکام ہو جاتے ہیں ہم گناہ بھری دنیا کے باسی ہیں۔ ناکام ہونے میں کوئی حرج نہیں ہے۔دوسری بات یہ کہ ہمارا ذہنی رجحان ایسا نہیں ہونا چاہیے کہ اگر لوگ ہماری ستائش  کریں تو ہم آگے بڑھیں اور جب وہ ہمیں تنقید کا نشانہ بنائیں تو ہم سست ہو جائیں۔ ہمیں اپنے دل میں موجود خدا دادجوش اور سرگرمی سے آگے بڑھنا ہے ۔

آگے بڑھیں:

آپ اپنے توڑوں کوکس طرح استعمال کریں گے؟

۱۔       کسی پُرسکون جگہ پر جائیں اوراِن تین نوکروں کی زندگی، ان کے پاس موجود وقت اور مواقعوں  پر غورکریں۔ان کے پاس موقع تھا کہ کوئی  نیا اور عظیم کام کریں جو باعثِ برکت ہو۔آپ ان نعمتوں اور توڑوں کے تعلق سے سوچیں جو خدا نے آ پ کو عطا کی ہیں۔

۲۔     خدا نے آپ کو جو وقت اور مواقع دیئے ہیں آپ ان سے کس طرح فائدہ اٹھا رہے ہیں؟

۳۔     فیصلہ کریں: کیا آپ خوف میں زندگی بسر کریں گے یا دلیری سے؟